以婚外情為主題，改編自同名18禁漫畫嘅Netflix日劇《金魚妻》日前公開正式預告！今次《超級特派員》篠原涼子將會化身外遇人妻，與岩田剛典上演一場不倫之戀，從而探討人妻們跨越禁忌界線嘅原因。

劇集改編自日本漫畫家黑澤R同名限制級漫畫，以單元形式描述6位人妻出軌嘅原因及經過。其中「金魚妻」章節，故事講述女主角平賀櫻（篠原涼子飾）因一次事故而放棄成為美容師嘅夢想，並嫁俾經營多間髮廊嘅丈夫（安藤政信飾）過住表面光鮮嘅生活，但實情就係每日被對方冷落及家暴，深知冇辦法離丈夫嘅小櫻就透過養金魚陪伴自己，結果意外邂逅金魚店店長（岩田剛典飾），並發展出一段不倫之戀。

大家除咗可以喺預告片見到篠原涼子及岩田剛典濕身激戰嘅畫面，另外幾個章節「外注妻 」、「便當妻」、「改裝妻」等等都似乎非常有睇頭，劇集將於2月14日於Neflix上映。唔知喺情人節睇外遇劇係咩感覺嘅呢？