相信大家返工都會偷玩下電話，若然唔影響工作嘅話確實無傷大雅，之不過洛杉磯就有兩名警察，就因為執勤期間為咗捉卡比獸同波克基古而唔理搶劫案求助，結果被當局革職。

據外媒《Insider》報導，事發於2017年4月，洛衫磯警員Louis Lozano及Eric Mitchell喺執勤期間，揸車前往「卡比獸」同「波克基古」出嘅出沒地點捉精靈，繼而無視當地一宗百貨公司搶劫案求助。法庭文件顯示，行車記錄儀錄到兩位阿Sir討論捉精靈話題長達近20分鐘，期間仲抱怨過隻精靈好難捉，結果兩人事後被革職並被控多項公職失當罪。

兩位阿Sir雖然承認失職，但就否認有玩Pokémon Go並上訴當局革職決定，經過五年審訊後，日前加州法院就駁回上訴，維持兩人解僱決定，令事件再次曝光。