日本著名遊戲雜誌《Fami通》近日公佈2021年度日本本土實體遊戲銷量榜，即係不問平台，統計由2020年12月28日至2021年12月26期間，日本本土最好賣嘅十款遊戲。但睇完個榜，大家或者就會擔心下PS係咪就黎玩完，因為頭十位都係Nintendo Switch遊戲！

圖片：截圖自Fami通

據《Fami通》報導，2021年期間，日本最好賣嘅十款遊戲分別係《Monster Hunter: Rise》、《寶可夢 晶燦鑽石／明亮珍珠》、《桃太郎電鐵 ～昭和 平成 令和也是基本款！》、《超級瑪利歐 3D 世界 + 狂怒世界》、《健身環大冒險》、《瑪利歐賽車 8 豪華版》、《Minecraft》、《集合啦！動物森友會》、《瑪利歐派對 超級巨星》以及《任天堂明星大亂鬥 特別版》。唔單止十款都係Switch遊戲，十款入面有六款仲係舊Game，即係話PS5連Switch嘅舊Game都打唔贏，情況令人擔心。

圖片：截圖自Fami通

如果你睇埋主機銷售量，整個情況就更加清晰。過去一年Switch賣咗近560萬部，累計近2300萬部；而PS5賣出97萬部，累計122萬部。單睇「人口」基數就已經相距甚遠。而且正如昨日同大家報導「池袋街邊出現大量PS5」時所言，於日本賣出嘅PS5，好多都係被黃牛賣去「其他國家」，所以實際上日本人擁有嘅PS5數目係遠低於銷售數。再睇返遊戲銷售榜第十位嘅《大亂鬥》都賣咗61萬隻，可能比起日本擁有PS5嘅人仲要多。

造成呢個局面，當然與PS5長期缺貨有關，但平心而論，Playstation其實係長年積弱。過去幾年間，其實每年都只係有一、兩隻PS系遊戲能夠登上年度銷售榜，其餘席位都係由任天堂系佔據。如果Sony方面再唔振作下，前景似乎並不樂觀。