{ SKIP }
文:MenClub 魏文青  
POSTED ON 17 Jan 2022

月初嘅時候就同大家報導過,著名Youtuber Logan Paul用咗350萬美金 (約HKD$2700萬),買咗一組六盒聲稱全新未開過嘅第一代Pokemon卡擴充包,消息傳出之後,唔少專業人士都對啲卡嘅真實性產生懷疑,而Logan Paul上週五亦發佈一條新片,實際打開嗰箱卡黎驗證其真偽,結果「不負眾望」,假架啲卡!

影片紀錄Logan Paul帶埋盒卡飛去芝加哥,與認證公司「Baseball Card Exchange (BBCE)」嘅負責人,以及賣盒卡畀佢嘅「Shyne150」會面,希望進一步驗證盒卡嘅真偽。BBCE負責人一開都仲講緊紙皮箱嘅封條有幾咁真、啲Label同個盒一齊老化,仲話如果入面啲卡係真嘅,其總值將數倍於350萬美金。誰知鏡頭一轉,佢哋打開個紙皮箱後,入面雖然係幾個疑似第一代Pokemon卡擴充包嘅盒,但好快佢哋就留意紙盒被內容物頂到變哂形,而且圖案打印質素亦非常差。Shyne150打開其中一盒後,就發現入面係一堆G.I Joe卡牌嘅擴充包。

簡單黎講,即係Logan Paul被人呃咗!但要留意嘅係,Shyne150係願意全數退返350萬美金畀Logan Paul,所以實際上被人呃而損手嘅其實係Shyne150,而騙案元兇就好可能賣盒卡畀Shyne150、一個叫Jacob Gabay嘅人。

正如之前講過,盒卡最早係2020年3月被放上加拿大eBay,某不知名買家以72,500美金買咗,再轉手賣畀Jacob Gabay,亦係Jacob Gabay拎盒卡去BBCE,並聲稱獲得認證係真品,Shyne150先會以270萬美金買下成組卡。咁既然Shyne150都係受害者,目前最可疑嘅就係Jacob Gabay。Shyne150亦於Logan Paul嘅影片最後,提出「唔知Jacob知唔知盒卡係假嘅?」疑問。

圖片:PokeBeach

更可疑嘅係,據《PokeBeach》報導,當Youtuber Rattle發佈影片,提出Logan Paul盒卡嘅各個疑點後,Rattle於IG上收到Jacob Gabay嘅恐嚇訊息,話自己「好有錢,身價150萬美金嘅年輕人」,並要控告Rattle誹謗,叫Rattle搵定律師。同時Rattle亦收到另一個疑似係Jacob Gabay私人IG訊息,話「畀50萬你Del咗條片佢。呢個係我個私人帳戶,Logan唔可以打開個盒」假若真係來自Jacob Gabay,似乎佢就知道盒卡有啲問題。

部份資料來源:PokeBeach

預計在明年夏天正式上映嘅《反斗奇兵5(Toy Story 5)》,近日流出一批疑似係劇照嘅渲染圖,隨住引起Fans們熱烈討論。事關相中唔見薯蛋頭先生及薯蛋頭太太嘅身影,令人擔心迪士尼會喺新一集刪走呢兩位經典角色。 ...
hobby
【影視】《反斗奇兵5》首批渲染圖曝光 薯蛋頭先生及太太或缺席今集?
09 Jul 2025
日本動漫文化於全球都有重大影響力,而隨住更多動畫登上各大串流平台,其受歡迎程度似水漲船高。近日Netflix就公佈最新數據,指出日本動畫嘅觀眾於過去數年間以倍數增長,到目前為止其全球訂閱者中有一半都會觀看日 ...
hobby
【影視】日本動畫成全球主流 Netflix指半數訂閱者近3億人觀看動畫
09 Jul 2025