正所謂「地上執到寶問天問地攞唔到」，但係而家地上有舊價值連城嘅寶物，你都未必拎得走。講緊嘅就係近日出現喺美國紐約中央公園入面，價值達到1170萬美元嘅24K黃金立方(45cm邊長)。

呢粒黃金立方，以24K 99.9%千足純金打造，重量達到400幾磅，係由德國藝術家 Niclas Castello 創作嘅藝術作品，佢今次嘅作品理念係「創造一啲超越我地世界嘅東西，係無形的。」

相信對黃金熟悉嘅朋友應該知道，要想將24K嘅黃金固定係非常困難，因為其質地實在太軟，所以呢粒立方係用一個特殊窯爐來保存其內容物，加上極端溫度熔化過程先有辦法完成製作。

400幾磅黃金，真係你想拎都唔係咁易拎得走，所以大部份人都係去一睹佢嘅風采，打打卡就算，不過唔知會唔會好似電影入面嘅大盜已經準備將佢偷走呢? 事實上，呢粒黃金立方喺紐約中央公園放左一日之後，已經被轉移至華爾街嘅一個私人晚宴中，所以市民可能再無機會親眼見到佢了。