之前我哋為大家報導過，中國騰訊串流平台引入David Fincher名作《Fight Club》後，自行刪改結局，話Tyler (Brad Pitt飾) 向有關當局報案後再入咗精神病院，堪稱奇幻嘅改動甚至連中國網民都唔同意。而近日David Fincher接受《Empire》雜誌訪問時，終於就此事作出回應：「幾搞笑呀！」

中國版《Fight Club》最後出現嘅字卡

David Fincher指出，雖然佢唔知究竟個中國版結局係邊個改出黎，但改嗰條友「一定有睇過原著，因為係幾似。」《Fight Club》電影改編自美國作家Chuck Palahniuk嘅同名小說，而小說最後，主角射穿自己個口後，的確係入咗精神病院。至於點解要改個結局，David Fincher就話：「我哋依家知道嘅，係有人向New Regency買咗於中國播放嘅版權，而合約入面就有條例牌條款：『你要明白為咗審查我哋可能會刪剪電影』，冇人講到明：『如果我哋唔鍾意個結局，我哋可以改架可？』所以大家要傾嘅係『刪剪 (Trim)』究竟係咩意思。」

圖片：IMDB

《Empire》指，與其話David Fincher因為個結局被人改咗而唔開心，不如話佢係「迷茫」。David Fincher指：「如果你唔鍾意個故仔，你做咩買佢返黎呢？如果有人黎同我講『我哋好想播你啲戲，但我哋希望將佢變成另一套戲』，聽落就完全唔合理。套死人戲上咗廿年，又唔係因為特別平易近人而出名。」

簡單黎講，就係David Fincher認為《Fight Club》上咗咁多年又咁出名，大家應該一早就知套戲嘅故仔係咩，如果你或你個國家唔鍾意呢啲故仔，就咪鬼買返去播，買完你又改咁做咩呢？

資料來源：Empire