除咗噚日同大家提過嘅《Deep Water》，古巴女星Ana de Armas另一部飾扮演瑪麗蓮夢露（Marilyn Monroe）嘅新作《Blonde》亦有望於今年上映，日前導演Andrew Dominik接受訪問時就透露電影尺度相當大膽，將會係超越R級嘅NC-17級別（即17歲或以下人士不得觀看）。

由Netflix發行嘅《Blonde》由紐西蘭導演Andrew Dominik執導並編劇，故事改編自美國作家Joyce Carol Oates同名小說，內容描述一代性感女神瑪麗蓮夢露嘅私生活（虛構，並非真實傳記）。除咗Ana de Armas，《The Pianist（鋼琴戰曲）》奧斯卡影帝Adrien Brody亦會飾演夢露第三任丈夫Arthur Miller。

早前有傳由於電影尺度太大，Netflix高層睇完初版立即取消原定於康城影展及威尼斯影展嘅首映計劃，並要求導演重新剪輯新版本。之不過導演Andrew Dominik最近接受外媒screendaily訪問時就話冇呢回事，但《Blonde》確實會係一部NC-17級別嘅電影，而且會有一場取材於原著小說嘅強姦場景，講述夢露被電影公司高層性侵。

NC-17電影通常有明顯嘅性愛場面、大量吸毒或暴力鏡頭等成人內容，例如當年嘅《色，戒》喺美國就被評為NC-17電影。