講起木村拓哉拍嘅電視劇，大家最常諗起嘅一定係《悠長假期》、《Love Generation》等以愛情劇，而黎緊4月由佢主演嘅嘅日劇《邁向未來的倒數10秒》，未播就被認為有《悠長假期》+ 《Love Generation》嘅影子，就黎50歲 (雖然個樣唔似) 嘅木村與35歲女星滿島光談戀愛，大家又會唔會有興趣？

圖片：朝日電視

木村於《邁》中飾演大學時期被視為拳擊新星嘅「桐澤祥吾」，但後來因為某啲事而放棄拳擊，亦因而失去愛情，結果就自暴自棄淪為Pizza外賣仔，一次機緣巧合被母校邀請成為拳擊部教練，遇上由滿島光飾演，、有個8歲女嘅單親媽媽拳擊部顧問「折原葵」。接下來就係愛情劇經典嘅大家睇大家唔順眼，但又因為一齊經歷某啲事而拉近關係，最後互相漸生情愫，男主角亦重新搵到生活嘅熱情。

圖片：朝日電視

講真嗰句，所有愛情劇嘅故事結構都離唔開呢啲套路，好唔好睇嘅重點除咗在於劇情如何包裝之外，亦好睇兩位主角嘅火花。木村拍愛情劇固然手到拿來，被日本媒體稱為「個性派演員」、2013年憑《我的超人媽媽》中患病單親母親一角獲得東京國際戲劇節最佳女主角加日本電視界三大榮譽之一放送文化基金獎、甚至獲網民票選為「39歲以上最適合做母親角色嘅演員」嘅滿島光亦遇上符合大眾期待嘅角色。或者可以期待一下？