講到經典恐怖片當然要提1998年嘅《午夜凶鈴》，入面嘅女鬼貞子更係家傳戶曉嘅恐怖角色，當年都唔知嚇到幾多小朋友唔敢開電視、接電話。事隔多年，近排貞子就轉行做YouTuber行搞笑路線拍片分享生活，頻道開設短短幾日就吸引到3萬幾人訂閱！

貞子嘅YouTube頻道名為「貞子の井戸暮らし」，首條片就係介紹日常生活及屋企環境，又同大家重溫一次從電視機及水井爬出嚟嘅經典畫面，認真搞笑。仲大爆自己其實係「干物女」，有時會喺屋企躺平乜都唔做，平時亦會打下機同煮野食。貞子嘅目標係獲得10萬個訂閱，按照依家個勢應該就唔難嘅，唔知目標達成後佢又會拍咩片娛樂大家呢？