隨住MCU最新劇集《Moon Knight（月光騎士）》即將播出，日前導演Mohamed Diab接受訪問時就突然批評對家嘅《Black Adam（黑亞當）》唔夠「埃及」，不滿華納兄弟更改原著背景設定，並邀請The Rock飾演本應係埃及裔嘅主角。

雖然Marvel同DC正常就大纜都扯唔埋，但咁啱《Moon Knight》同《Black Adam》兩部作品都有埃及元素，所以就有位被人拎嚟比較。前者講述主角因為瀕死而獲得埃及月神孔蘇（Khonsu）能力成為超級英雄，而後者「Black Adam」直頭係古埃及王子，擁有埃及六神之力，但強大嘅力量令佢走偏成為超級反派。

出生於埃及嘅《Moon Knight》導演Mohamed Diab日前接受訪問時表示，為展示埃及人嘅才華，以及每種文化都應該交由該人民呈現，所以佢請返嚟嘅演員、編劇、服裝設計師、藝術總監以及作曲家大部份都係埃及人，繼而批評同樣擁有埃及背景嘅電影版《Black Adam》缺乏埃及元素，而且華納仲改埋原著漫畫設定，將故事背景由埃及改成一個虛構嘅中東國家，以使搵非埃及裔演員出演，令佢感到非常不滿，覺得嘥咗一個好機會去展現埃及文化。不過佢最後都打返個圓場，認為唔可以怪晒落劇組，畢竟漫畫入面都冇成日提起埃及。

值得一提嘅係，《Black Adam》預計今年10月21日先正式上映，或者導演可以睇完套戲先再評論。

資料來源：screenrant、cbr