自從俄羅斯入侵烏克蘭，著名演員Sean Penn就一直為烏克蘭發聲。佢曾經親赴烏克蘭拍攝入侵過程，又揚言如果奧斯卡頒獎禮唔邀請烏克蘭總統澤連斯基發言，佢就會溶咗自己兩個小金人獎座。近日佢接受《Hollywood Authentic》訪問時，更直言曾經諗過為烏克蘭參戰。

圖片：電影《The Thin Red Line》 via IMDB

Sean Penn於訪問中多次提及早前於烏克蘭拍攝紀錄片、與澤連斯基會面等經歷，亦提到佢個人係希望再次回到烏克蘭拍攝更多內容，「但我唔係傻仔，我唔肯定能夠為對方提供啲咩，亦唔會不停喺佢哋被攻打、國民被謀殺時不停傳訊息去煩總統 (澤連斯基) 或者佢啲官員。」Sean Penn隨後指出，雖然佢過去亦曾經到訪戰場，但其實從未致身危險當中，「數據上，我其實從未致身於險地之中。包括2003年我喺巴格達 (當時Sean Penn去反對美國入侵伊拉克)，當時我自己一個於Green Zone (相對安全嘅國際控制區) 之外逗留5日，其實只有百份一機會會死。」

在 Instagram 查看這則貼文

Sean Penn（@seanpenn）分享的貼文

「所以唯一會令我上次喺烏克蘭留耐啲嘅合理原因，就係我拎起支步槍，而且應該唔會著避彈衣，因為作為一個外國人，你會想將件避彈衣交畀一個冇避彈衣嘅當地民兵，又或者一個戰鬥技巧比我更高嘅戰士，又或者畀個能夠戰鬥更久嘅年輕人。」最後當然佢就冇咁做，但佢坦言呢個念頭的確出現過，「如果你曾經去過烏克蘭，呢個念頭一定曾經喺你腦海中出現過。然後你就會諗『依家究竟係咩年代？』早幾日我喺Brentwood (加州地名)一個油站，依家我就諗緊拎起武器對抗俄羅斯？發生緊啲咩事？」

資料來源：HollywoodAuthentic