早前Netflix全球訂閱人數首次下跌，大家就已經高呼「串流王者」之位要換人、「Netflix王朝不再」，而Disney旗下嘅「Disney+」當然就係其中一名有力繼任者。而根據Disney日前公佈嘅第二季業績，Disney+全球訂閱人數於2022年首三季增加近800萬人，繼續坐穩全球第二受歡迎串流平台之位。

據Disney於業績上公佈，撇除由印度星空傳媒經營嘅「Disney+ Hotstar」，單單「Disney+」目前嘅全球總訂閱人數去到8760萬人左右，其中2022年首三季增加約790萬人，成績比起去季少咗20萬人嘅Netflix當然更好，同時亦比去季增加300萬人、屬Warner Bros.陣營嘅HBO及HBO Max增長得更快。但值得留意嘅係，單論總訂閱人數嘅話，目前依然係Netflix以約2.22億人居首，而Disney就算加埋Hulu以及EPSN+等旗下所有串流平台，都只係得2.05億人。

圖片：Disney

另一樣要留意嘅係，即使訂閱Disney+嘅人數創新高，但據業績顯示，Disney+目前都仲係蝕緊錢，而Disney方面嘅解釋就係因為製作成本、宣傳成本及技術成本都較高，而從Netflix過往嘅經驗估計，要降低呢啲成本其實相當困難，加價又會減緩訂閱人數嘅增長，所以日前Disney就宣佈會於年嘗試推出月費較平，但有廣告嘅新訂閱模式，一方面吸引更多人訂閱Disney+，另一方面亦開拓廣告收入。