位於埃及吉薩嘅胡夫金字塔（Pyramid of Khufu），係現存最大嘅金字塔，同時係古代世界七大奇蹟當中唯一尚存嘅建築物。今次LEGO就透過1,476塊零件還原呢座宏偉建築，組裝完成後高20cm、長35cm、寬32cm，除咗金字塔本體，模型亦展示出兩個小金字塔、寺廟、迷你獅身人面像、方尖碑、以及兩艘埃及小帆船Felucca。

將金字塔外層揭起，更可以見到金字塔可能建造方法之一嘅石頭搬運系統，而轉向背面就欣賞到建築內部結構。不過呢款模型實際上得半個金字塔，如果想要一個完整金字塔嘅朋友，不妨考量買入兩套再併埋一齊！

「LEGO 21058 Great Pyramid of Giza」售價為129.99美元（約$1,020港幣），預計2022年8月1日正式發售。