當身邊朋友都開始生仔後，我就留意到有兩派截然不同嘅育兒方法——有人因為怕影響小朋友智力發展，所以唔畀小朋友望到任何發光螢幕，每次見到都會刻意將小朋友個頭擰向另一面；同時又有人將電話、iPad當係電子奶咀，以求一時安靜。但根據一個瑞典研究，其實有個既可以為小朋友解悶，又唔會影響其智力發展，甚至能夠提升佢智商嘅方法——畀個小朋友打機！

來自瑞典著名醫學院「卡羅林斯卡學院 (Karolinska Institutet)」以及荷蘭Vrije大學嘅研究員，早前就電子媒體莓對小朋友智力發展做咗個研究。佢哋先搵黎超過9,000名9至10歲嘅美國小朋友，要求佢哋進行一系統認知能力測試以評定智商，再要求小朋友及家長紀錄小朋友每日花幾多時間睇電視、睇影片、打機 (Video Games，手機Game唔計)以及碌社交媒體。然後於兩年後搵返其中5,000名小朋友出黎最做多次測試。

結果發現，小朋友們平均每日用2.5小時睇電視、30分鐘睇社交媒體、1小時打機。而當中打機時間超過平均1小時嘅小朋友，其兩年後嘅智力水平比起其他人平均高2.5分。考慮到研究人員統計時，控制咗基因分別、家長教育程度及收入等外部因素，研究結論就係打機有助小朋友智力發展。

更值得一提嘅係，雖然睇電視、碌社交媒體無助小朋友智力發展，但同時研究亦搵唔到兩者對小朋友嘅智力有任何負面影響，換言之睇電視、玩電話本身唔會令小朋友變蠢。但同時要留意嘅係，研究只限於美國小朋友，亦冇提到研究中小朋友玩嘅究竟係邊類型嘅遊戲、邊類型遊戲嘅影響又最大。

資料來源：Science Daily