只要大家有返咁上下年紀，一聽到「摺機」呢兩個字，腦中出現嘅畫面應該都係十幾年前盛極一時嘅Motorola Razr V3等摺機，但對於年輕一代而言，「摺機」可能係講緊近年先出現嘅「可摺疊智能電話」，甚至有人根本就唔知世上有「摺機」呢一回事。好似日前日本仙台就有一少女報警，指佢喺仙台站見到有人持刀，結果發現對方其實只拎住一部舊電話！

ガラケーの見間違い

一瞬、それっぽく見えてしまう pic.twitter.com/L6FBX6qAlA

— いろはす (@mosimosikaidesu) May 19, 2022

成件事係咁嘅：上週四下午一點半左右，仙台警方接到有人報案，指JR仙台站中有人手持刀狀物，於是立即派出大量警員前往仙台站戒備。值得一提嘅係，警方到達仙台站後，曾經與報案女子查詢事發經過。而當時報案女子嘅同行女友人就提出過，佢覺得該名男子手持嘅唔係刀，而係一部摺機。但警方抱住「唔怕一萬至怕萬一」嘅心態，依然進行搜查。並透過站內閉路電視成功確定「可疑人物」嘅外表，最後成功搵到呢位男子。男子亦非常合作地配合警方進行搜身，結果警方發現男子身上冇刀，而唯一個樣「似刀」嘅，就係一部舊摺機。最後警方證實係虛驚一場並放行該男子。

圖片：Wikipedia

事件被日本傳媒報導後，就成為日本網民嘅熱話。唔少人都估計，報案女子可能非常年輕，年輕到佢連摺機都未見過，所以先會誤認為係刀。亦有網民指出，平心而論，當年又長又直又薄嘅摺機，打開後個樣的確係有幾分似刀，如果女子未見過接機，誤會係刀係情有可原。另外網民亦感嘆，當年盛極一時嘅摺機，如今竟然被人認錯，時代真係變咗啦。

資料來源：朝日新聞