Johnny Depp控告Amber Heard誹謗案審訊部份昨日正式完結。隨住JD方日前傳召多位「反駁證人」攻擊AH方嘅理據，AH昨日亦試圖反擊。先有法證電腦專家試圖掃除「AH傷痕照有執過」嘅疑慮；再有早前曾上庭但表現奇差嘅臨床心理學家Dawn Hughes，再次上庭堅稱AH患有PTSD (創傷後壓力症)。但昨日審訊嘅重點，就在於AH再次上庭，成為整場審訊嘅壓軸好戲。

AH接受JD方律師Camille Vasquez交叉審訊，大家可以留意JD身旁嘅律師Ben Chew嘅反應

對比起JD方傳召JD本人黎反駁對家說詞，AH方昨日就似乎係想打出感情牌。AH於律師引導下，花咗好一段時間講述JD前律師Adam Waldman嘅聲明對其生活有幾大影響，AH真正「欲哭無淚」地表示：「我每日都被騷擾、侮辱、威脅，就算只係行入呢個法庭、坐喺到面對成個世界，都有人用我過往生活中最差嘅部份黎羞辱我。啲人想殺死我、佢哋想將我個BB (去年搵代母生嘅) 放入微波爐。」然後又指自己每日收到上百條、整個審訊期間共收到上千條死亡恐嚇，又指大家都取笑佢嘅供詞。AH話自從離開JD後就經常出現驚恐症，身邊人要掂佢時有「不能說的規則」以免引發症狀。最後更指JD奪走佢嘅發聲機會，「我有權去講自己嘅故事。」

但當JD方律師Camille Vasquez進行交叉審訊時，AH再次收起喊樣，變得極具攻擊性，多次與Camille Vasquez「疊聲」發言，二人針鋒相對。Camille Vasquez第一個問題就係：「(於整場審訊中) 你啲大話喺全世界面前被踢爆咗好多次，對嗎？」AH回應：「我冇講過任何大話」。隨後Camille Vasquez就列出AH被「踢爆」嘅大話，例如AH曾作供指，佢與JD於2013到Hicksville旅行車營地渡假時，JD曾經因為某個女仔捱落AH身上而醋意大發，捉住該女子嘅手腕威脅會整斷佢，但當時同行嘅AH好友Rocky Pennington作供時就話冇見過呢回事，AH於庭上回應：「嗰日好多人，我唔知佢見到邊一Part」。

AH早前亦作供指Hicksville當日，JD將「旅行車打爛，營地經理非常嬲」，但日前JD方搵到營地負責人上庭，佢就話其實架車只係爛咗一個燈罩，而且當日佢見到係AH因為不滿JD冇陪住佢而發爛渣，而JD「瑟縮一角」。AH回應指：「我唔知嗰條友係邊個黎，又唔知佢關唔關事。我知好多人係為咗參一腳而突然之間走出黎 (come out of the woodwork)。」暗指營地負責人講大話。而對於被指當日係佢本人發爛渣，AH回應：「我知好多人會為咗加入呢場『The Johnny Depp Show」講任何嘢」，此話一出就連JD律師Ben Chew都Wow一聲。

至於日前前《TMZ》員工指，2016年5月佢哋收到線報，要去加州法院門外拍攝「AH面部帶傷」嘅片段，AH同樣堅決否認自己就係放料者，「有邊個被人家暴嘅人會想咁做？」AH同樣否認於2016年8月將「JD破壞廚房」嘅影片報料予《TMZ》。Camille Vasquez引述《TMZ》員工指當日收到影片後15分鐘就已經剪好條片、拎到原版權擁有者授權再將條片放上網，證明條片必然係來自拍攝者AH本人，AH同樣否認，「我唔知係咪真，又係咪可以做到，我淨係知事實唔係咁。」換言之再暗指《TMZ》員工講大話。

隨後Camille Vasquez就出示兩張由AH方呈堂、同樣影住一個倒瀉咗酒嘅地下、睇起黎完全一樣嘅照片，表示AH曾於庭上分別作供指一張係紀錄2015年12月15日嘅事件、但另一張係紀錄2016年5月21日事件。而AH就拒絕正面回答，指自己只係見到「部份照片」，分唔清究竟係邊日、邊件事時拍攝，更挑釁Camille Vasquez可以唔好遮住相片旁嘅Metadata，「咁咪一睇就知囉」，結果連法官都出聲提醒，遮蓋Metadata係照片證據嘅常規。AH亦試圖主動向陪審團解釋metadata嘅作用，Camille Vasquez唯有主動制止：「希望你唔好同陪審團爭執」。

交叉審訊尾聲，Camille Vasquez質問AH：「你估唔到Kate Moss都願意為Depp先生出庭，對嗎？」AH表示：「唔係，我知幾多人會跳出黎 (come out of the woodwork)支持JD。」又指「所有經過90年代、千禧年代嘅人都聽過 (JD推Kate Moss落樓梯)傳聞，我都聽過幾個人講過，所以當我個暴力老公不單止襲擊我、仲襲擊我個妹時我當然會諗起個傳聞啦！」至於營地經理、《TMZ》前員工，AH就表示：「我知有幾多人願意走出黎為佢 (JD) 講任何嘢，呢個就係佢嘅能力，佢係一個有權力嘅男人，而好多人都會巴結有權力嘅人。」Camille Vasquez打斷AH並反問：「巴結到冒住作偽證嘅風險上庭？」AH表示冇聽到個問題，Camille Vasquez再反問：「你冇聽到我問題？」AH就帶有怒氣地回答：「Vasquez小姐，如果你唔介紹嘅話請你問多次，我冇聽到你個問題。」最後Camille 問完最後一個問題，未等AH回答完就已經向法官完結交叉審訊部份。

案件審訊部份已經完全結束。美國時間週五 (香港時間今晚深夜) 控辯雙方將會進行結案陳詞，隨後陪審團就會退庭商討。由於下星期一為美國假期，相信案件最快要於下星期二先有結果。