每次我哋喺網上見到任何「奇怪」嘢，唔少人第一時間都會認為舊嘢係黎自日本，畢竟日本喺大家嘅印象中就係「合理地奇怪」嘅地方，但其實泰國亦係一個「合理地奇怪」嘅國家。就例如泰國傳媒近日報導嘅呢一個飲品袋造型，如果喺香港見到你可能會覺得好噁心，但如果喺泰國見到，唔知點解成件事又好似好合理咁架喎。

據泰國媒體《Sanook》報導，呢個飲品袋係來自泰國南部宋卡府嘅某個飲品檔，佢哋出售嘅飲品種類其實頗為平凡，都係泰國奶茶、綠茶、阿華田、可可之類，但特別在佢哋個飲品袋下方，就有個理論上係方便大家打開飲用嘅部份，只要打呢個部份末端嘅封口，客人就能輕鬆飲到袋入面嘅飲品，問題係呢個部份喺裝滿飲品後，就成為一條又粗、又長、個頭仲特別大嘅條狀物，再考慮到飲品會從條狀物嘅頭部噴入你個口，成個感覺就變得相當奇異。

至於呢個形狀究竟係巧合，定係檔主刻意，就不得而知啦。