唔少人會喺公餘時間撈多份兼職賺下外快，最好就係輕鬆得嚟又時間彈性嘅工作。最近日本就出現一款名為「Stchar！」嘅工作，只要孭住播緊廣告嘅iPad行街就可以賺錢！

據官方介紹，大家只需一部iPad、一個專用背囊同埋日本電話號碼，就可以註冊「Stchar！」開始賺錢，整個過程無需面試，鍾意幾時收工就收工，而工作內容亦非常簡單，只需孭住部iPad去到指定地點周圍走，電腦會自動播放各式各樣廣告。據官方所講，時薪最高可達1200日元（約$74港幣）。

不過，目前只有澀谷忠犬八公銅像方圓500米屬於賺錢區，如果走出咗呢個範圍就唔會計錢㗎喇，未來會逐漸擴展到更多地方。