日本扭蛋向來層出不窮，經常會有意想不到嘅產品出現。最近有動物園就推出「動物毛髮扭蛋」，只需¥500就有機會抽中北極熊毛毛，結果唔夠三日全數售罄！唔知會唔會吸引到其他廠商效法，推出第二啲毛嘅扭蛋呢？

位於北海道札幌市嘅圓山動物園(日：円山動物園)，日前擺放咗兩部與別不同嘅扭蛋機，一部裝有北極熊毛、北海道雪兔毛、設德蘭矮種馬前額毛、日本錦蛇皮(自然脫落)，而另一部就裝有園內動物用過嘅物品，包括亞洲象踩過嘅沙、雪豹抓過嘅木片，以及黑猩猩或馬來熊所用過嘅布料，總共有八款，每抽500日元(約$30港元)。

正如海報標題「圓山動物園應援扭蛋」所講，今次扭蛋所有收益都會作用改善園內動物福祉。而且大家亦唔使擔心，因為所有毛髮都係屬於自然或梳理期間脫落，整個過程並冇動物受到傷害。雖然目前已全數售罄，亦唔知會唔會補貨，但有機會嘅話你又會唔會扭返件呢？