{ SKIP }
文:MenClub 魏文青  
POSTED ON 06 Jun 2022

Johnny Depp控告Amber Heard誹謗案經過多個星期娛樂性十足嘅審訊,於上週以7名陪審團一致裁定JD勝訴作結,相信大家都會為JD感到高興。但你又有冇諗過7名陪審團究竟因為咩理據而判JD勝訴?佢哋對AH作供時嘅表現/表演又有咩睇法?日前TikTok上就有位叫「@Seekinginfinite」嘅網友,自稱係7名陪審團之一,並公開佢對於案件嘅睇法。

圖片:@Seekinginfinite on TikTok

聲稱自己係7名陪審團之一嘅「@Seekinginfinite」以唔出樣、把聲亦似乎經過處理嘅形式,於TikTok發佈咗三條片,分享佢自己對案件睇法。第一條片中,佢一開始就話「今日係我為案件擔任陪審團嘅最後一日。我希望保持匿名,但同時又想分享我對案件嘅一啲睇法」又指自己其實唔太熟流行文化,並唔係JD或AH嘅Fans,「所以我覺得自己對件嘅睇法應該幾中立」。

隨後佢就分享,佢個人對於AH作供時不停望實陪審團感到「極度不舒服」,以至往後只要AH作供,佢就會刻意避開AH嘅視線,純粹專心聽AH講咩,「而佢講嘅所有嘢聽落都係9up (Bullshits)」。「@Seekinginfintie」又指審訊期間佢有遵從法庭規定,避開社交媒體等第三方資訊來源,係審完佢再睇返TikTok,先知原來大家同樣覺得AH望實陪審團嘅行為非常奇怪。「所以…對JD黎講係好消息。聽完審訊中所有資料後,呢個就係我嘅第一反應。但AH……真係一個痴線女人 (what a crazy woman)」。

於另一條片中,「@Seekinginfinite」就分享咗陪審團係點樣得出最終判決——AH三項誹謗罪名全部成立要賠1500萬美金,JD一項控罪成立要賠200萬美金。佢話AH告得入嗰條罪,係JD前律師Adam Waldman指AH與朋友特登摷亂間屋再報警,以誣告JD家暴,「實際上AH有冇咁做到,不幸地係冇辦法證實。但能夠證實嘅係,JD個律師講呢句嘢的確有誹謗到AH」。同時佢亦解釋點解陪審團認為JD三項指控全部勝訴,但賠償金額就遠少於JD方要求嘅5000萬美金,「雖然唔少陪審團都希望賠足5000萬畀JD,但一來個金額不切實際,二來唔係所有陪審團都同意個金額,所以最後就搵咗個大家都同意嘅中間數」。

同時「@Seekinginfinite」亦有回答網友嘅提問。當被問到:「邊個瞬間係你開始覺得AH講大話,以至佢所有作供都不可信?」「@Seekinginfinite」就回答:「我會話係捐咗錢/應承捐錢嗰下。」AH曾多次聲稱自己已經將與JD離婚時收到嘅700萬美金捐哂出去,結果於庭上被JD方律師Camille Vasquez踢爆,AH情急之下更講出「應承會捐同真係捐咗,對我黎講係同義詞」。

對於AH方嘅證人,「@SeekingInfinite」亦有補充。佢話佢覺得AH個妹Whitney Henriquez,似係因為「責任以及被操縱」先上庭為其姐作供,「睇黎佢就好唔想喺到咁。」

值得一提嘅係,法官早前宣佈考慮到案件受高度關注,所以所有陪審團嘅名字都會保密一年先公佈,換言之目前係冇辦法知道呢位「@Seekinginfinite」究竟係咪真嘅陪審團。而目前「@Seekinginfinite」嘅整個TikTok帳戶都已經被刪除。

資料來源:7News

隨住《鬼滅之刃》最新一季「柱訓練篇」將於30日完結,故事即將進入最終篇章「無限城篇」,正當Fans們猜測最終大戰會以電視動畫還是劇場版呈現時,官方就疑似走漏風聲,意外曝光「無限城篇」將製成三部劇場版播出。 ...
hobby
【動漫】《鬼滅之刃》官方周邊曝「無限城篇」將製成三部劇場版播出
24 Jun 2024
曾為《機動戰士高達》阿寶、《聖鬥士星矢》星矢、《名偵探柯南》安室透等著名角色配音嘅古谷徹,早前被爆出與37歲Fans發生不倫關係長達4年半,甚至強迫對方墮胎並施以暴力行為,引起軒然大波。時隔一個多月,古谷徹 ...
hobby
【日本】古谷徹宣布辭演《名偵探柯南》安室透、《海賊王》薩波
24 Jun 2024