日本首飾品牌「U-Treasure」最出名嘅，就係與各大動漫聯乘嘅鑽戒首飾，當中由合情合理嘅《Hello Kitty》、《Disney》、《Pokemon》甚至《Evangelion》，再到估佢唔到嘅《Ultraman》、《忍者亂太郎》等都有，近日佢就為《Pokemon》系列增添新成員，而且唔再係戒指首飾，而係一粒「精靈球」鑽石！買返黎狠狠地車落女朋友到，可能就收伏到佢做老婆啦！

呢粒「精靈球鑽石」，顧名思義就係一粒望落去同精靈球有幾分似嘅鑽石，而據U-Treasure個官網講，呢粒鑽石總共有143個切割面，比起一般鑽石嘅58面多出超過一倍，結果就係粒石特別閃。而且如果你從鑽石正上方望落去，更可以隱約見到有個精靈球圖案，如果你同未來老婆都係《Pokemon》迷，的確又好似幾有心思嘅。

精靈球鑽石可以配搭品牌旗下各款Pokemon戒指，而且由普通鑽石轉用精靈球鑽石係唔需要另外加錢，換言之售價完全係取決於戒指嘅款式同材料。例如上面呢隻比卡超戒指，用上最貴嘅白金加18K金，售價都只係12.54萬Yen，即係HK$7,300左右。以一隻鑽戒黎講，唔貴呀。

資料來源：U-Treasure