玩情懷又怕固步自封，創造新角又怕唔夠星戰，大家覺得《Star Wars》呢個IP應該點樣走落去呢？

最近忙於宣傳《雷神奇俠4：愛與雷霆》嘅Taika Waititi，日前接受Total Film訪問時表明自己嘅《Star Wars》電影唔想炒冷飯，將會創造更多新角色及新事物。Taika Waititi表示：「我認為星戰宇宙需要擴張，必需擴張。我唔認為製作一部令觀眾睇到『太好啦，係千年鷹號嘅藍圖！啊，佢係Chewbacca個嫲嫲呀！』嘅電影係有意義。」所以佢希望透過創造更多新事物、新角色，從而擴展整個星戰宇宙。

早於2020年「國際星戰日」，迪士尼就敲定《雷神奇俠3 & 4》導演Taika Waititi將會執導下部《Star Wars》電影，並聯同《1917》、《Last Night in Soho》編劇Krysty Wilson-Cairns共同撰寫劇本，但到目前為止，官方仍未公布電影名字、故事簡介、演員陣容等等，上映遙遙無期。