食好西真係幾時都唔會嫌多！

如果你有食過銅鑼灣居酒屋《Hungry Monkey》，一定覺得唔錯！近日荃灣區嘅街坊有福啦，因為佢地正式登陸海之戀商場，將美味嘅鐵板料理擴散開去！

講到《Hungry Monkey》一定要提佢嘅名物御好燒，你可以選擇自己鍾意嘅口味，最後再加上紫菜碎或紅薑絲。其中特別值得一試嘅係港島燒，由餐廳獨創嘅港式鐵板燒，材料選用別具香港特色嘅食材，如叉燒、臘腸、莞茜、蝦米、肉鬆等 ，將港日兩地味道混為一燒！

講到矜貴食材又點少得龍蝦！選用來自澳洲嘅龍蝦 ，每隻約重 13-14兩，即叫即燒，肉量豐滿又鮮美。你可選擇以海膽醬燒、芝士燒或香草蒜蓉牛油燒烹調，講真點燒最後都一定好好味！

而講到IGable嘅，一定要嗌呢度嘅清酒煮蜆，餐廳以創新獨特方式製作，用透明玻璃紙包著清酒煮蜆，在鐵板上烹調，再以絲帶打結，做成小禮物咁款上檯，賣相精緻吸睛，拆開絲帶，清酒香氣即時噴射出來，蜆肉粒粒飽滿肉嫩，一個字: 鮮！

最後想介紹嘅，可能唔係個個受落，但絕對唔係度度有得食，講緊嘅就係雞Pat Pat。唐揚南國鳳尾 - 選用來自日本沖繩鳳尾(即雞Pat Pat)，以高溫烹調，把食材油脂逼出後，表皮香酥又不油膩，風味十足，是一道絕佳下酒佳餚。

好味食材當然要配上舒適嘅環境，《Hungry Monkey》新店門面以木色為主調，配合店內外搶眼螢光招牌及玩味猿人圖案，氣氛十足。店內設有一列長長特色吧枱，一端是調酒區，另一端是鐵板區，食客可近距離欣賞調酒師及廚師嘅手藝，又可以與廚師交流，彷如置身日本東京新宿夜街嘅居酒屋一樣！

店嘅盡頭亦另有乾坤，原來係一間擁有落地玻璃嘅廂房，中央放有一張發光的beer pong table，配合餐廳琳瑯滿目酒精飲品，可以大玩特玩多款刺激好玩嘅beer pong 遊戲，又食又玩，適合一大班朋友盡興！