Meme圖，台灣媒體又稱為「迷因」或「梗圖」，亦即於網上瘋傳嘅搞笑圖片/影片。雖然話Meme圖嘅出發點大多係為咗搞笑，但有時被整成Meme圖嘅對象就會因為咁而受到傷害。好知《Kick-Ass》女星Chloë Moretz，就因為一幅Meme圖而大受打擊，甚至話自己變成一個「隱士」。

圖片：網上圖片

卻說Chloë Moretz日前接受《Hunger Magazine》訪問，談到名氣及社交媒體如何影響佢嘅生活。「有好長一段時間，我可以分別做『大家見到嘅Chloe，以及『私底下嘅Chloe』，但突然之間呢兩個身份就開始重疊，而我覺得非常曝曬而且脆弱。而當中有一張Meme圖係非常影響到我，就係有人將我拎住個Pizza行入酒店嘅相，P到同動畫《Family Guy》入面某個超長腿但個身極短嘅角色一樣嗰張。嗰時所有人都講緊呢張Meme。」

從原圖可見，Chloë Moretz個身係被人刻意P短咗

圖片：網上圖片

自己成為被取笑對象當然唔會開心，但更令Chloë Moretz難過嘅係，當佢同人訴苦時，得到嘅反應係「你唔好嘈啦，我覺得好L好笑喎！」Chloë Moretz指自己冇辦法改變身體，但佢就因為咁而被人笑，張圖仲要成個Instagram都係，「就算到今日，如果我見到張Meme，我都會覺得好難接受。」

為咗避開大家嘅注意，於是佢就遠雜人群，過住啲如同「隱士」嘅生活。「一方面我可以喺冇人影到我嘅情況下體驗生活，但同時亦令我面對鏡頭時極度緊張，我心跳會爆升而且會過度呼吸。

資料來源：CNN