同大部份超級英雄電影一樣，《Thor: Love and Thunder（雷神奇俠4：愛與雷霆）》用上大量綠幕拍攝及CGI技術，製作出各種天馬行空場景，雖然能夠節省時間及成本，又能避免天氣等外在因素影響，不過並非每位演員都鍾意喺綠幕前表演，於劇中飾演反派「屠神者戈爾」嘅Christian Bale就係其中一人。

最近Christian Bale接受英國GQ專訪時，就分享到《Thor 4》綠幕拍攝感受，認為過程單調乏味（monotony）：「我第一次咁做(拍綠幕)，我嘅意思係，綠幕演出嘅定義就係單調乏味。你有傑出嘅工作人員、有比我(綠幕)經驗更豐富嘅演員，但你能夠區分每一日拍攝嘅分別嗎？唔得，完全唔得，我甚至冇辦法分清每個攝影棚，工作人員總係話：『你係3號攝影棚』我回答：『即係邊一個？藍色嗰個？』工作人員：『係，不過你而家喺7號攝影棚』，我心諗：『Uh，即係邊個？』」

雖然Christian Bale唔鐘意綠幕拍攝，不過佢發現飾演「屠神者戈爾」比起飾演「蝙蝠俠」更容易同有趣，因為佢認為觀眾會注意反派多啲：「每個人都會對反派著迷，只要反派出場，就冇人再理會正派，所有目光都集中喺反派身上，所以今次演出更為容易。」