呢兩日打風落雨天氣轉凍，終於有幾分冬天嘅味道，亦提醒大家係時候喺屋企搵個又軟又溫又舒服嘅位過冬——咩話？你屋企冇呢啲位？咁你就要向《龍珠》入面嘅菲利學下嘢啦！因為Bandai出咗個「菲利飛行器懶人座」呀！

《龍珠》Fans就會記得，菲行初出場時係長期坐住飛行器，從來都唔會用自己對腳行路，據講當年鳥山明老師就係想表現出其高高在上嘅氣勢，所以刻意設計呢個「皇座」畀佢。黎到現實世界，Bandai就按菲利飛行器推出一張懶人座椅，當然就冇可能識飛架啦，但就基本保持咗桶形設計，而且全數用上軟稔稔、暖笠笠嘅材質，除咗適合大家窩喺入面過冬之外，睇落仲非常適合貓奴們買黎做貓窩。

呢張「菲利飛行器懶人座」長約95cm、高約70cm，睇圖就無論大人細路都可以成個人屈哂入去，而且前方仲好鬼貼心咁整咗個放電話嘅位，我已經想像到自己成個冬天坐喺入面廢住過日子嘅美好光景。唯一缺點就係售價，要成29,700Yen，即係約HKD$1,580。

資料來源：Bandai