細個睇動畫，大家一定有幻想過可以好似啲主角咁，一係就架四驅車識得自己飛起再轉圈，又或者個陀螺識得飛啲聖獸出黎，結果？當然就係唔發生。不過除住科技發展，玩家甚至可以憑一己之力重現動畫中嘅場景。好似來自法國嘅《遊戲王》愛好者SuperZouloux，就用咗7個月時間自學「AR (擴增實境)」技術，結果成功製作出一個「AR投影對戰系統」，令玩家出牌時，真係會有召喚獸跑出黎！

SuperZouloux除咗係一名《遊戲王》愛好者，佢本身亦有進行《遊戲王》對戰實況等內容。據佢於YouTube發佈嘅影片中講，一切嘅起源係3月時佢去睇咗個有運用AR技術嘅演唱會，令佢產生利用AR技術重現《遊戲王》對戰嘅想法。於是佢用咗7個月去學習相關技術，由製作帶有感應功能嘅遊戲墊、為每張卡加上感應器、親手為遊戲人物、怪獸建立3D模型、以至所有編程等都係自己包辦，最終成功製作出呢套「AR投影對戰系統」。

實際運用上，就係玩家只需將帶有感應器嘅卡片放上特製遊戲墊上，電腦就會自動識別放上去嘅係咩卡，再自動投影3D模型到畫面之上，營造出玩家真正「召喚」出魔物嘅效果，而當玩家利用魔物攻擊時，3D模型亦會有相應嘅動作。而為咗方便進行實況，SuperZouloux亦利用自動識別卡牌嘅功能，於實況畫面上實時更新玩家嘅出牌，同時佢亦可以透過腳踏式按鈕操控鏡頭，令觀眾可以近距離欣賞到3D模型。

SuperZouloux於影片中話，佢認為只要你肯畀心機去學，無論任何嘢都一定學得識。睇到佢召喚出青眼白龍個興奮樣，就算辛苦7個月都係值得嘅！