你睇中國近年大刀闊斧限制兒童打機時間，就知喺唔少人眼中「細路打機」係一件唔好嘅事。不過近日美國嘅一個研究就發現，打機似乎有助兒童認知能力嘅發展，能夠提升專注力及短期記憶力。唔知大家又會認同「中國模式」定「美國研究」呢？

圖片：Unsplash

據報，美國Vermont大學精神病系助理教授Bader Chaarani早前發佈咗一個研究，指每日打機嘅兒童，於認知能力及短期記憶力嘅表現，都比從未打過機嘅同齡兒童更好。Chaarani教授嘅研究利用美國大型兒註腦部發展調查「 Adolescent Brain Cognitive Development (ABCD) Study」所收集到嘅數據，從中選出2,000名9至10歲嘅兒童，並將其分成「從未打過機」以及「每日打機三小時以上」兩個組別進行分析。特別要提到嘅係，之所以會用「每日打機三小時以上」呢個標準，係因為美國兒科學會嘅指引話兒童每日唔應該超過兩小時，所以研究人員刻意揀一班理應「唔健康」嘅小朋友出黎。

兩組小朋友要分別進行兩個測試，一個係按照螢幕出現嘅左、右箭咀，儘快按下對應嘅按鈕，同時系統亦會隨機出現「停止」標示，小朋友就要完全唔撳掣，其中「唔撳掣」呢個部份，研究團隊就表示可以測試兒童「控制衝動 (impulse)」嘅能力。另一個測試，就係先將一張人像照展示畀小朋友睇，然後再展示另一張人像照，並要求小朋友回答兩張相入面個人是否同一人，研究團隊表示呢個測試可以得出小朋友嘅短期記憶力。

圖片：Unsplash

結果發現，「每日打機三小時」嘅組別，於兩個測試中嘅得分都明顯高於「從未打機」組別，而且從小朋友測試期間嘅腦部掃瞄黎睇，「每日打機三小時」嘅小朋友腦部中有關注意力及記憶力嘅部份亦較為活躍。

不過Chaarani教授亦指出，目前無法得知「打機」同「更高專注及記憶力」之間邊個係因、邊個係果，所以未來仲需要進一步研究。佢亦希望可以知道不同類型嘅遊戲，對於兒童腦部發展嘅影響。同時佢同強調，「對住個Mon」太多，對於小朋友嘅心理及身體發展始終都係唔好，只係比「冇可見好處」嘅YouTube、TikTok，打機可能係個更好嘅選擇咁解。

資料來源：Association of Video Gaming With Cognitive Performance Among Children