Beckham與Victoria長子Brooklyn一直都話想做廚師，而近日佢就接受外國媒體《Bustle》訪問時，更加親身示範調配兩款雞尾酒。就咁睇成件事似乎係合情合理，不過因為Brooklyn於影片中聲稱自己「非常鍾意創作新飲品」，但佢教嘅卻係用Gin酒同湯力水整Gin Tonic，搞到一眾網揚言：「我真係睇佢唔透」。

事情係咁嘅：Brooklyn接受《Bustle》訪問嘅時候，就應邀示範調配兩款雞尾酒，而喺片段一開始，佢就話自己「非常具實驗性，好鍾意試下整新嘢，可以話我係廚房痴線佬」，令觀眾非常期待佢究竟會整啲咩出黎。但結果佢教嘅第一杯雞尾酒就係非常簡單嘅Gin Tonic，而且雖然佢加入咗青瓜片、迷迭香及薄荷葉，但杯嘢嘅本質依然係「Gin酒加湯力水」，實在就唔算有咩大突破。

而佢教嘅第二杯雞尾酒，就係Lychee Martini，比較特別嘅係佢用荔枝罐頭入面啲水黎代替荔枝糖漿。

Brooklyn嘅雞尾酒食譜

由於Brooklyn「吹到好大」但最後就教人用Gin同湯力水整Gin Tonic，所以片段一出街後就立即引來網民嘲諷：「嘩，用Gin同Tonic黎整Gin Tonic喎，邊有人諗到呀？」，「佢話自己好有實驗性又係廚房痴線佬，結果佢就係用Gin同Tonic黎整Gin Tonic」。不過亦有網民懷疑Brooklyn係故意反串，反過黎嘲諷一直睇佢唔多順眼嘅網民，不過是真是假就得Brooklyn自己會知，難怪網民指：「咁多年啦，我都係睇佢唔透」。