黎到年尾，唔少人都開始盤點各類年度榜單，而日本藝人東野幸治早前就登上電視製作人佐久間宣行嘅YouTube，盤點佢今年睇過嘅動畫。其中佢既盛讚《SLAM DUNK》電影動作及畫面「好到無嘢可以講」，又為《吹響吧！上低音號》及《夏日時光》分別打出96及97分高分。不過更搶眼嘅，就係佢吐糟著名「胃痛作」《來自深淵》真係睇到佢嘔，更揚言套動畫應該會被定為「38禁」，大家千祈唔好輕易嘗試。

《來自深淵》嘅原作係由土筆章人創作、2012年起開始連載嘅同名漫畫，2017年被改編成動畫、而動畫第二季就於今年7月開始播放。東野幸治指出，《來自深淵》係前乃木坂46成員松村沙友里向佢推薦嘅其中一套動畫，而雖然佢睇哂兩季動畫，亦認為呢部作品非常優秀，但作品以可愛畫風、描述極其殘忍故事 (網民稱呢種故事風格為「胃痛」) 嘅做法就令佢心情非常複雜，更揚言睇到半路真係嘔出黎。佢甚至笑稱，動畫已經唔係「18禁」嘅程度，應該被列為「38禁」。最後評分部份亦只能打上「??」，因為佢實在冇辦法向大家「推薦」呢部動畫。