打機絕對係一個主流興趣，但呢個世界上有唔少人就因為傷患、疾病，連我哋思之為等閒嘅「拎起手掣」都未必做到。而Sony昨日就於CES上，宣佈佢哋正在研發一款無障礙手掣，希望能令所有人都享受到遊戲嘅樂趣。

呢個無障礙手掣計劃名為「Project Leonardo」，Sony指佢哋搵黎多位無障礙領域專家、社群成員、遊戲開發商共同研究，最後得出呢款可以平放嘅碟狀控制器。從圖中可見，碟狀嘅邊緣最多可以安放8個按鈕，正中又多一個，而每個邊緣按鈕嘅鍵帽形狀、實際功用都可以由用家自定，玩家亦可以將多個按鈕定為同一功能 (例如幾個掣都係「X」) 又或者將最多兩個功能對應到一個掣之上 (例如一個掣撳哂L3+R3)，以配合佢哋嘅身體狀況。而從個「碟」延伸出黎嘅方向控制部份，除咗同樣有三款不同嘅鍵帽外，亦可以調節同個碟之間嘅距離。

Project Leonardo本身可以單獨使用，亦可以配合DualSense手掣使用，玩家最多可以連結兩個Project Leonardo加上一個DualSense，甚至可以同其他人協力使用 (例如佢用Dual Sense控制方向，我同Project Leonardo控制開槍咁)。同時配有四個3.5mm AUX連接埠，以支援各種外部按鍵與第三方輔助配件。

資料來源：Playstation