近年香港電影業長處於低迷狀態，唔好講港產片，就連荷里活大作都唔一定會有大量宣傳。不過堪稱所有男士青少年回憶嘅《SLAM DUNK》就打破呢個悶局。除咗早前介紹過嘅旺角戶外大型海報、大家近日或者都有見到嘅主題電車，iSquare英皇戲院仲於電影上映當日 (即係今日1月12日) 於戲院擺放360度主題打卡位！

打卡位將佔據戲院嘅部份空間，整體以籃球場作為主題，地板固然有籃球場線，而左右兩邊就分別係湘北五子嘅個人巨型海報，以及五人嘅紅色湘北球衣背號，兩邊仲有LED屏幕播放電影相關圖片及片段，整體儀式感十足。相信即使係最唔鍾意打卡嘅麻甩佬去到，都會忍唔住影返幾張相。

另外如果觀眾購買英皇戲院嘅《THE FIRST SLAM DUNK》IMAX版戲飛兩張，仲會送湘北隊球員球衣號碼襟章乙份；如果你係戲院嘅VIP會員，就買一張IMAX戲飛送多把「湘北全員紀念扇」。