所謂一將功成萬骨枯，每一個成功紅到你同我都知道嘅偶像，背後其實都有無數個同樣懷住偶像夢，但就因為各種原因而未為人識嘅少女。如果你都係當中嘅一份子，你或者會選擇放棄夢想，返去讀書或者打工。但今日要介紹呢位「戸田ころね」，佢就唔單止冇放棄，仲決定自己話事，最後做埋經理人公司老闆、團隊製作人及成員。

「戸田ころね」2017年加入地下偶像團體「atME」開始演藝之路，後來又輾轉加入過另外兩個偶像團體，但都未能獲得令佢滿意嘅成績。佢於一個訪問中講過，當時佢就已經係「大人們唔鍾意嘅小朋友」，因為佢會不停提出「點解我哋唔做呢啲」嘅意見，希望可以幫助團體發展。所以當佢從第三個團體畢業後，佢就決定自己搞一間經理人公司、自己搞個偶像團體、自己再做埋成員，反正就係一切都掌握喺自己手中。

佢提到，就係自己落手落腳做，先發現件事唔係當年佢想像得咁簡單，並開始明白當年嗰班「大人」其實有幾辛苦。但佢就1憑住對於音樂嘅熱誠、以及「除咗偶像之外冇其他嘢想做」嘅決心，努力咁帶領團體向前。近日佢仲為《週刊Playboy》拍攝水著寫真，進一步提升自己嘅人氣。大家要多多支持佢啦。

IG：toda.corone