【動漫】《來自深淵 烈日的黃金鄉》宣布推出續篇動畫 作者：要趕稿喇！

由日本漫畫家土筆章人創作嘅奇幻漫畫《來自深淵》於2017年改編成動畫，而第二季《來自深淵 烈日的黃金鄉》就喺上年7月播出，憑可愛畫風及暗黑獵奇劇情大受歡迎，如今官方就正式宣布製作續集動畫，但暫時未知係全新總集篇定係新一季動畫。不過有追開原著漫畫嘅朋友應該都知道，目前動畫劇情已經追上原作第60話(目前漫畫更新進度為第63話)，作者土筆章人就喺Twitter表示將會加快腳步趕稿，希望佢唔會因為趕工而捱壞身體啦。

急げええ！！元気なうちに！！原稿を！！ https://t.co/fUvPQ61kFn

— つくしあきひと (@tukushiA) January 15, 2023

《來自深淵》講述一座四面環海嘅孤島上，存在一個直徑約一千公尺，名為「深淵」嘅巨型縱向洞窟，數百年嚟不斷有人類前往探險試圖解開當中奧秘。喺孤兒院長大嘅主角莉可，自細就憧憬成為一位獨當一面嘅探洞者，並希望深入深淵尋回失去聯絡嘅媽媽。莉可有日進行野外訓練時遇上一名嚟自深淵嘅機械人男孩雷格，兩人就此展開一場冒險之旅。