近期上海有隊新晉女團「SHA48」出道，官方宣傳照上嘅甜美形象吸收唔少網民。然而，當Fans見到5位成員真人時卻發現嚴重貨不對辦，其中一位成員更係「男兒身」！

據了解，SHA48由五位嚟自四川、重慶及江蘇等地嘅成員組成，分別係鈴鐺、魚魚、小綠、小聆及君君。從宣傳照上可以見到佢哋主打甜美清純妹妹路線，無辜水汪汪大眼吸引唔少網民成為Fans。

然而就喺上個月尾，唔少有份出席SHA48首次公演嘅Fans都大為震驚，除咗發現成員真實樣貌同宣傳照相差甚遠，其中擔任「C位」嘅鈴鐺更係男兒身偽娘，相關表演片段隨即被上傳到微博瘋傳，引起網民熱烈討論。

對於有關爭議，SHA48就喺官方微博澄清，表示佢哋從來都冇自稱過係「女團」，而係一個單純的地下偶像團體、單純的為愛發電，而團名靈感就係嚟自上海某個機場縮寫，同日本嘅「48集團」無關。同時亦無懼負評，繼續舉行握手會等偶像活動。