繼2019年《蜘蛛俠：決戰千里》後，終於再有Marvel電影獲准引入中國市場，唔知會唔會刪減片段呢？

上一部喺中國上映嘅Marvel電影已經係2019年6月《蜘蛛俠：決戰千里》，其後嘅《黑寡婦》、《永恆族》、《尚氣與十環幫傳奇》、《蜘蛛俠：不戰無歸》以及《奇異博士2：失控多元宇宙》等作品都因為各種原因而被有關當局拒諸門外，令一眾中國Marvel迷叫苦連天。事隔三年半，日前Marvel就喺官方微博宣布，MCU第四階段最後一部電影《黑豹2：瓦干達萬歲》及第五階段首部作品《蟻俠與黃蜂女：量子狂熱》已獲准引進中國市場，預計將於2月7日及2月17日上映。

對於今次Marvel電影重回中國市場，唔少中國網民都感到非常興奮，紛紛表示「知道沒有你的這幾年我怎麼過的嗎！」、「啊啊啊啊啊啊啊啊我想死你了」、「啊啊，漫威我愛你！！黑豹被我刷十遍」，亦有網民希望蜘蛛俠同奇異博士2能夠重新上映。有分析認為，今次中國之所以會拆牆鬆綁，係同《阿凡達：水之道》中國票房大收有關，另有人指出係同迪士尼更換CEO有關，但實情係點就不得而知。