人氣動畫《SPY×FAMILY》其中一個著名場景，就係主角「黃昏」洛伊德喺槍林彈雨之下用手榴彈保險針向約兒求婚，整個過程既浪漫又震撼。最近日本萬代旗下扭蛋品牌GASHAPON就出咗隻同款求婚戒指，等大家可以扮下頂尖間諜洛伊德·佛傑。

呢款扭蛋名為「Ringcolle! DX SPY×FAMILY」，除咗手榴彈保險針之外，仲有伊甸學園星星及閃電、彭德煲呔、約兒金色玫瑰頭飾，以及洛伊德西裝襟章等6種款式，分別由亞鉛合金、鋼及ABS材質製成。而且扭蛋外殼設計亦參照咗伊甸學園制服配色，採用黑色蓋搭配金色底座，預計2023年5月下旬推出，每抽¥400（約HK$24）。