日本《鐵拳》女選手「たぬかな」，於去年初時發表「身高不足170cm的男人沒人權」言論造成「炎上」，結果被戰隊及贊助商解約，たぬかな亦消隨即消失於人前。不過事隔一年，たぬかな近日再次進行直播，除咗繼續針對身高不足170cm嘅人之外，仲自爆差啲就去咗「Muteki」拍AV。

卻說去年たぬかな於直播時分享被快遞員搭訕嘅經歷，當時佢就話對方「連165cm都冇，我同佢一定冇可能啦！」隨後更「加碼」指出「身高不足170cm嘅人唔配有人權，請你哋抱住『我冇人權』嘅想法生存，唔啱就去做增高手術啦，夠170cm你就有人權啦。」結果言論造上日本網絡「炎上」，たぬかな被戰隊及贊助商紅牛解約，隨後消失於人前。

事隔近一年，たぬかな早前再次進行直播。直播一開始佢就先為當時嘅言論道歉，並指過去呢一年都係靠存款生活，非常難捱。隨後佢就指出直播事件發生三日後，有一位女性友人向佢介紹工作，原先話係「幫一個鍾意打機嘅老闆做秘書」，但去到先發現對方係同成人產業有關。對方更提出，「如果係你嘅話，去Muteki (三上悠亞出道時嘅AV片商) 出道都冇問題，拍兩三部片就可以賺5000萬Yen！」不過たぬかな就冇接受到呢個提案。

但更值得一提嘅，或者係即使經過一年慘痛教訓，たぬかな把口依然唔收。直播たぬかな多次表示「當初講『人權』係我唔啱，我應該話『唔鍾意矮仔』」，更指「事件發生後有好多人打電話去我老家，如果係我或者我阿媽聽佢哋就會破口大罵，如果係男人聽佢哋就會唔出聲收線，啲矮仔就係咁」、「矮仔好小器又暴燥」。

另外，たぬかな嘅回歸直播有成8,000人同時觀看，比起當初出事嗰次直播只有30人睇大有進步。