人類對於太空總係有無窮嘅想像，就好似古人見到月亮啲班紋有啲似隻兔仔，結果就諗咗成個「玉兔」嘅故事出黎。而近日NASA科學家就喺火星表面發現一隻有眼有口鼻，個樣仲幾得意嘅熊，唔知又會唔會啟發到更多故仔呢？

圖片：NASA

呢張相係由NASA嘅火星偵察軌道器 (Mars Reconnaissance Orbiter)上嘅超高清攝影機 (HiRISE) 拍下。只見圖中有一隻圓臉圓眼，口鼻部份突起而且仲微微張開嘅熊，睇落有幾分似著名Meme圖「唔L係掛樹熊」。而科學家就解釋，最外圍嗰個圈，應該係一個大隕石坑被溶岩或沙塵填滿之後留底嘅痕跡，而嗰兩隻眼，就係兩個大細相近嘅隕石坑；至於口同鼻，就係一個崩塌咗嘅火山或者山。簡單黎講，就係一切都只係巧合。

圖片：Wikicommon

笑哈哈隕石坑

圖片：NASA

事實上今次亦唔係人類第一次於火星表面拍到「熟口熟面」嘅圖案。其中最著名嘅，大概就係1976年時，海盜1號觀察器於火星塞東尼亞區 (Cydonia) 拍到一塊巨型人臉，當時更掀起一股開於火星高等生物嘅討論，但後來更清晰嘅圖片就證實塊「臉」其實只係一個平頂山；另外火星偵察軌道器亦曾於2008年拍到過一個「笑哈哈」隕石坑。

資料來源：Science Alert、Universe Today