早前日本一名17歲高中生因為於壽司郎舐碟、用沾滿口水嘅手指掂輸送帶上嘅壽司，令壽司郎股價一度大跌，市值蒸發160億Yen。而壽司郎早前亦公開表示，會以刑事及民事方面追究到底。而近日有報導指出，涉事嘅高中生，平時其實係個乖仔，而且目前已經從中學自願退學

據日本雜誌《女性Seven》報導，該名涉事高中生，其實係來自日本岐阜縣，並就讀當地一間公立中學。而當地街坊表示，該名少年平時其實好聽話，仲會去附近嘅田到幫忙做農活。由於該名少年於涉事片段中係一頭金髮，所以有人認為佢係不良少年，對此街坊就話，其實少年平時都係正常黑頭髮，只係因為當時放緊寒假，所以就於雙親同意下去染金個頭。

街坊亦表示，冇估到個高中生會於放假時搞出咁大件事，相信佢依家應該好大壓力。

據同一個街坊透露，自從事件爆發後，無論係少年本身定係佢嘅父母都相當憔悴，並且因為唔想為學校帶來麻煩，所以已經申請從高中退學。據日本傳媒早前報導，事件發生後，該名少年嘅高中曾收到大量投訴電話，而壽司郎亦被客人投訴管理不善。目前日本壽司郎目前採用應急措施，例如於檯與檯之間加上膠板分隔，同時目前只提供點餐服務，輸送帶上唔會有壽司。

資料來源：女性Seven