楊紫瓊、關繼威於今早嘅奧斯卡頒獎禮上分奪最佳女主角及最佳男配角，話佢哋係目前最炙手可熱嘅亞洲演員都不為過。而Disney方面亦乘勢推出由幾乎由《奇異女俠玩救宇宙》班底包辦所有角色嘅新劇《西遊ABC》預告。

《西遊ABC (American Born Chinese)》改篇自華裔美國漫畫家楊謹倫於2006年推出嘅同名漫畫，故事講述美國出生嘅華裔青年王進 (Ben Wong飾) 因遷居而轉學至美國市郊嘅一所高中，並成為校內唯一一名華裔學生，受到校園欺凌同時，又愛上白人同學Amelia (Sydney Taylor飾)，令佢對自己身份認同產生困惑。同時佢又預上來自台灣嘅交換生孫維辰 (劉敬飾)，並因此捲入發生於現實嘅《西遊記》故事之中。

《西遊ABC》中有大量演員都曾出演《奇異女俠玩救宇宙》，其中楊紫瓊將飾演觀音娘娘、關繼威飾演Freddy Wang，而於《奇》中出演二人女兒、並獲提名最佳女配角 (輸咗畀同作嘅Jamie Lee Curtis) 嘅Stephanie Ann Hsu (中文名許瑋倫)，以及飾演楊紫瓊老父嘅94歲華裔美藉演員吳漢章，則分別會於劇內客串石磯娘娘以及玉皇大帝。大家熟知嘅吳彥祖則會出演齊天大聖孫悟空。

《西遊ABC》預計於5月24日在Disney+上播放。