如果一眾《Star Wars》迷記性夠好，或者就會記得2021年4、5月期間，Disney曾經多次明裏暗裏表示自己正在研發一把「伸縮光劍」，到當年5月4日「《Star Wars》日」更加於YouTube公開宣傳片正式發佈，表示會於2022年發售。但到依家2023年啦，把劍都仲係冇聲冇氣。直到近日於西南偏南 (SXSW) 博覽會上，迪士尼樂園主席Josh D’Amaro就首次拎住把劍公開示人。

作為《Star Wars》系列中最具代表性嘅物品，歷年黎不論係官方定係副廠都出過N把不同型號、功用嘅光劍。而Disney宣佈會推出嘅呢把之所以咁受注目，係因為佢成功還原電影中光劍「未著時得個柄，著咗就伸出發光劍身」嘅效果。而從與會者於SXSW上拍到嘅影片可見，Josh D’Amaro於迪士尼樂園未來發佈會上，親自在台上示範啟動伸縮光劍，再配上埋經典音效，引起場內人士驚叫歡呼。

而固中原理，其實早於兩年前就已經有人從迪士尼提交嘅專利文件中搵到線索。把光劍嘅劍身平時會如捲尺一樣收於劍柄之內，啟動時由摩打帶動，連埋LED燈一齊捲出，形成「伸出」嘅效果。不過由於劍身係「捲出黎」，所以理應會相對柔軟，相信就唔適合用黎對打。