日本媒體《Oricon》每年都會邀請男讀者票選出「最想同佢拍拖嘅女名人」排名，而「結衣BB」更曾一連五度蟬聯冠軍。不過隨住結衣BB、石原聰美等女神先後嫁人，呢個排行榜亦出現變化。好似早前公佈嘅最新排行中，吉岡里帆同綾瀨遙就成為雙冠軍，而大家由細睇到佢大嘅環奈BB，亦一口氣衝到第三名！

吉岡里帆

綾瀨遙

橋本環奈

呢個排名榜每年都係嗰十令廿個女星「爭奪」，所以上得榜嘅其實都係「老臉孔」。例如今年嘅雙冠軍吉岡里帆同綾瀨遙，其實就係去年嘅第一，二位，其中讀者對綾瀨遙嘅普遍評價係「同佢一齊感覺會好開心」、「經常笑、性格開朗，為人自然友好」等；而對吉岡里帆嘅評價就係「充滿療癒感」、「笑容好可愛」。而較為特別嘅係去年新上榜排第七嘅橋本環奈，今年一躍而上成為第三，網民對其評價係「可愛而且性格好好，同佢一齊會好快樂」、「把聲好聽而且似乎好聰明」。

廣瀨玲

今田美櫻

有村架純

福原遙

浜邊美波

長澤正美

白石麻衣

而接下來嘅四、五、六名，就同往年一樣，分別由廣瀨玲、今田美櫻，以及有村架純佔據，不過位列共同第六名嘅仲有今年新上榜嘅福原遙，讀者對其評價為「美麗而明亮嘅笑容」。而接下來嘅浜邊美波、長澤正美以及白石麻衣，都係呢個排名榜嘅常客。比較值得一提嘅係浜邊美波去年係第三，但今年就跌到落第八，幾乎對環奈BB對調位置。

總結而言，今年十個上榜女星，有九個同往年一樣，唯一分別係福原遙取代去年排第八嘅本田翼。另外多位女星都收到「笑容好可愛」、「經常笑、性格開朗」等評價，可見女仔嘅笑容的確係最吸引男仔嘅地方。

資料來源：Oricon