隨住《薩爾達傳說 王國之淚》將於5月12日正式發售，昨晚任天堂率先公開10分鐘實機試玩片段，詳細介紹林克4種新能力！各位機迷睇完期唔期待？

《王國之淚》故事接續前作結局，講述主角林克同薩爾達公主打敗災厄加儂後，兩人展開全新冒險之旅，除咗依舊有廣闊嘅海拉魯大地，舞台更延伸到天空上嘅浮島。從實機片段可見，玩家能夠透過全新能力「倒轉乾坤」，讓物體運動軌跡倒轉，例如見到一粒石頭從浮島降落到地上，玩家只要企上粒石使用「倒轉乾坤」就可以好似搭lift咁升上空島。

而「餘料建造」就可將兩件唔同素材組合成一把全新武器，例如將樹枝結合岩石就可以製作出攻擊力及耐久度更高嘅鎚仔，就連弓箭亦可以透過新能力製作出唔同效果，例如弓箭結合魔物眼珠，發射後會自動追蹤敵人，讓玩家發揮創意。

此外，林克可以透過全新能力「究極手」將唔同物體結合及分離，從而製作出各種載具，例如將幾碌圓木結合成一艘木筏，再裝上風扇機就可以變成氣墊船。

最後就係「通天術」，玩家可以喺特定地方運用此能力穿透到天花板上方，除咗建築物之外，亦可以喺特定山洞使用，能夠一口氣穿過牆壁登上山頂。

與此同時，官方亦宣布將於4月28日推出 《薩爾達傳說 王國之淚》主題設計Nintendo Switch（OLED款式）主機，5月12日推出特別設計嘅Pro控制器及便攜包，不過售價方面就尚未公布，如果仲用緊舊款Switch嘅機迷不妨考慮順便換埋新機。