由ESA舉行嘅「E3」展，曾經係世界第一大遊戲大會，過往各大遊戲開發商亦會於E3宣佈新作、大作嘅重大消息。不過自疫情開始後，E3就取消咗實體遊戲展，只曾於2021年舉行網上展會。本來大家都以為今年疫情消退，E3會強勢回歸，點知近日ESA就宣佈取消今年嘅活動，原因係啲廠商冇回歸！

卻說過去兩年各大遊戲展都因為疫情而取消時，遊戲廠商大都轉為舉行自家線上發佈會。或者就係發現唔需要掉一大舊錢搞展覽都可以接觸到玩家，同時自己舉行發佈會時間更有彈性，所以即使E3回歸，多間遊戲廠都早早講明唔會參加。例如本身就擁有主機嘅任天堂同Microsoft早前就宣佈唔會出席E3，另一巨頭Sony就早於2019年就已經開始疏離E3，今年亦不會參展。

另外一眾遊戲開發商，例如Ubisoft、bethesda、EA、SEGA以至中國騰訊等，亦確認不會出席。

由於E3陷入無人出席嘅局面，所以上週ESA就宣佈取消今年E3。據籌辦方Reedpop嘅全球遊戲副總裁Kyle Marsden-Kish於一封傳媒公告中指，縱然佢哋花咗好多時間嘗試去搞今年嘅E3，「但我們要做出對整個行業以及E3有利嘅決定」。同時佢亦表示「我們明白有興趣參展嘅廠商無法準備好可供試玩嘅遊戲，亦明白到要準備好參展所需嘅資源係一個無法克服嘅難關」。

不過，考慮到考慮到Microsoft會於原E3展期前兩日舉行自家發佈會「Xbox Games Showcase」，Ubisoft更會於E3展期內舉辦線上發佈會Ubisoft Forward，你話佢哋「無Game可展」似乎就唔太準確，更似係E3對於廠商嘅吸引力大減。所以縱然ESA及Reedpop都表示下年會繼續嘗試舉行E3，但前景都唔太樂觀。

資料來源：Eurogamer