多得Warner Bros. (WB)與創作團隊之間嘅角力、演員們戲裏戲外嘅風波，過去幾年整個DC電影系列 (DCEU) 一直處於渾沌狀態，即使早前搵黎James Gunn接掌後，一眾Fans大多都只抱有觀望態度。不過近日「前朝遺物」之一嘅《The Flash》於美國CinemaCon舉行試映，結果首波評價極為正面！更可能成為DCEU嘅救世之作！

卻說WB及DC於CinemaCon期間安排咗《Flash》嘅首次公映，事後有份去睇嘅媒體人都爭先發佈初步影評，而且全部都極為正面。《TheWrap》嘅電影記者Umberto Gonzalez睇完後於Twitter發文：「啲炒作係信得過架！唔計Christopher Nolan嗰幾部，《The Flash》係過去30年間最偉大嘅DC電影，能夠同1978年嘅《Superman》以及1989年嘅《Batman》相提並論。」

而《Fandango》及《RottenTomatoes》嘅影評人Eirk Davis亦誇讚電影係「史上最好嘅超級英雄電影！創新嘅故事、精彩嘅動作場面、非常好嘅演員。仲有大量嘅Fans向細節，睇到最後我連眼淚都流埋。套戲有哂所有大家想喺超級英雄電影中得到嘅嘢，而且有剩添呀！」另外Erik Davis亦指電影充滿《回到未來》嘅味道，同時大讚Michael Keaton、Ezra Miller、Ben Affleck以及Sasha Calle等人嘅演出。

BELIEVE THE HYPE! Christopher Nolan movies aside, #TheFlashMovie is the GREATEST DC movie of the last 30 years that belongs in the same conversation as SUPERMAN 78 and BATMAN 89. The movie breaks incredible new ground in superhero cinema & honors DC lore of years past. #TheFlash pic.twitter.com/zGkhpfjlsl

— Umberto Gonzalez (@elmayimbe) April 26, 2023

I’m honestly floored it’s this good. As a monster BACK TO THE FUTURE fan, it has BTTF vibes all day. Michael Keaton is amazing, as expected, and this is the best Ezra Miller has been as Flash. Affleck gets some of his best Batman moments, too, and Sasha Calle rocks! #TheFlash pic.twitter.com/1cfyamTg9M

— Erik Davis (@ErikDavis) April 26, 2023

《The Flash》以及預計2023年12月上映嘅《Aquaman 2》，乃係James Gunn入主DC前已經拍好嘅作品。而由於《The Flash》嘅故事本身就係關於漫畫中嘅「閃點事件」，亦即The Flash回到過去後改變漫畫正史，所以被視為WB及DC「重啟」整個DCEU嘅契機。而James Gunn早前就指，《Aquaman 2》將會連結到佢首個DC計劃《Superman: Legacy》，所以兩部作品係有承先啟後嘅重大任務。