喺人人都有智能手機之前，每年學期尾影嘅畢業照，好可能係大家同同學嘅唯一一張齊人合照。不過近日日本Twitter就流傳一張非常詭異嘅謎之畢業照，只見成班近30名學生，僅有6個人能夠親身出席，再加上相中男老師嘅奇怪舉動，令呢相張成為日本網絡熱話。

【業務連絡】本日５月５日は、「あまりにも不穏すぎる卒アル集合写真」がネットに投稿され話題になった日ですhttps://t.co/4mNGQPGxGN pic.twitter.com/PvLwWw2lm0

— 滝沢ガレソ???? (@takigare3) May 5, 2023

喺呢張經過翻拍並略為裁剪，而且單睇相片質素都已經有啲年代感嘅畢業相中，可以見到只有6名學生有親身出席，其餘至少23名學生都缺席拍攝，只能後期加上大頭證件相代替。而有出席嘅六名學生亦全部逼埋一角，令理應熱熱鬧鬧嘅畫面變得相當冷清，氣氛頗為詭異。更詭異嘅係，如果你仔細睇，就可以見到位處正中位置嘅男老師，似乎將佢隻手放上旁邊女老師嘅大脾之上，二人關係似非尋常。

呢張「謎之畢業照」，最早係由一名網民「K」於2011年5月5日放上個人部落格，當時就已經引起一陣熱議，而日本流行新聞Twitter「滝沢ガレソ@takigare3」就於上週嘅「發佈紀念日」重Post呢張相，結果再次引起日本網民討論。

相片最早於2011年5月5日被發佈於網上

圖片：https://ameblo.jp/kentastic-life/entry-10882296768.html

由於張相最早於2011年5月，亦即日本「311地震」兩個月後發佈，所以唔少網民都猜測相中嘅學生會唔會係地震及海嘯嘅倖存者，而缺席嘅同學已經於天災中離世。不過亦有網民指出，如果學生們係來自災區，咁後面間學校似乎又太完整，亦唔覺得災民會有心情影畢業相 (日本畢業季節同為3月)。另外有網民猜測，其他同學可能係因為食咗學校提供嘅膳食而集體食物中毒，而能夠出席嘅六名同學就係因為冇交餐費而「倖免於難」。不過目前一切都只係猜測，相片嘅真相依然冇人知道。