相信大家都知日本演藝界有鋪「動漫真人化電影癮」，所以即使大部份作品嘅票房口碑都麻麻地，依然係長拍長有。但有大家未必知嘅係，佢哋其實仲有鋪「動漫真人舞台劇癮」，大部份有啲人氣嘅作品 (特別係偏「腐」嘅) 都會有舞台劇版，大熱如《鬼滅之刃》亦當然唔例外。好似我今日要為大家介紹呢位「遥りさ」，就係《鬼滅》舞台劇出身啦！

你可能以為憑現年26歲嘅「遥りさ」嘅超可愛面孔，加上頗有睇頭嘅身材，佢喺《鬼滅》舞台劇入面就算唔係做彌豆子，起碼都係做個「戀柱」、「蟲柱」，又或者「香奈乎」等重要角色。但其實佢於2021及2022年兩次參演《鬼滅》舞台劇，其實都只係做「群演」，即係一人分飾多個小配角嘅演員。喺舞台上可以話唔太起眼。

但佢於舞台外嘅發展就相當唔錯。2019年出道之後好快就獲得《週刊Young Magazine》邀請拍攝寫真，去年秋天更登上《FLASH》嘅秋冬特別寫真，早前4月更推出首隻寫真DVD，正式進軍寫真界，連帶佢嘅舞台劇演出都開始被人注意。

不過佢於接受訪問時就提到，自己嘅目標依然係做演員，希望有朝一日能夠做到黃金時段劇集嘅主角。換言之寫真對佢黎講似乎都係踏腳石，大家有得睇好快啲睇啦。

IG：haruka_risa_official