講起史泰龍 (Sylvester Stallone)，大家當然第一時間會諗起佢拍過嘅經典動作片，但我諗有唔少人亦會諗起佢有三個靚到唔似佢生嘅女。而近日史泰龍接受訪問時就露出「女兒傻瓜」嘅一面，表示佢希望三個女都變成「老處女 (Spinster)」永遠都留喺屋企。

卻說史泰龍與其現任妻子、本身係模特兒嘅Jennifer Flavin，以及三個女Sophia、Sistine及Scarlet早前拍攝家庭真人騷《The Family Stallone》，近日為咗宣傳而成家一齊上節目接受訪問。席間主持人Hoda Kotb問到三姊妹「有史泰龍做你老豆會唔會好難拍拖？」大家姐Sophia就回答：「我哋都係單身，所以…」而史泰龍就接話：「我希望佢哋會變成老處女，我正朝著呢個方向努力，等佢哋呢世都會留喺屋企。」

大家姐Sophia

二家姐Sistine

三妹Scarlet

二家姐Sistine就表示老豆「有時都真係嚇親人」，仲話有時啲男朋友黎見完家長之後就唔會再返黎，「就係因為佢太得人驚！佢連Hello都唔同人講架佢！」對此史泰龍就回應：「我唔信佢哋！我唔信男人架…」女兒打斷佢話：「你成日都係咁講架啦！」史泰龍就反駁，「咩我成日咁講？歷史都係咁講架！你睇人類咁耐以來嘅進化史…」結果佢老婆又打斷佢：「但你同阿妹個男朋友相處得幾好呀！」三妹Scarlet亦表示「佢同我男朋友係死黨黎！」對此史泰龍膚衍回答：「係呀，我哋個紋身仲襯咗添呀…」可見一代硬漢喺三個女面前都係毫無還手之力。