今次BANDAI所推出嘅機械人玩具，取材自2022年啟動嘅「新．日本英雄宇宙（Shin Japan Heros Universe，簡稱S.J.H.U）」企劃，集結庵野秀明《福音戰士新劇場版》、《真．哥斯拉》、《新．超人》以及《新．幪面超人》四部「新（Shin）」作品。

據官方介紹，玩家可以將哥斯拉、幪面超人、EVA初號機及超人從原本狀態，組合成高24cm嘅「新．宇宙機械人」，騎住旋風號嘅幪面超人將會變成機械人頭部，初號機同超人就分別成為左右手同腳，而哥斯拉就擔任軀幹，並將初號機嘅AT力場當作盾牌，超人嘅十字死光當成武器，心口仲掛住一個突破AT力場嘅哥斯拉頭。

《S.J.H.U.PROJECT シン・ユニバースロボ（新·宇宙機械人）》定價為23,100日元，折約$1,300港幣，5月19日起開放預購，2024年1月正式發售，唔知大家會唔會有興趣呢？